Каратэчиларимиз карантиндан сўнг навбатдаги ўқув-машғулот йиғинига киришди

Мана 5 ойдирки спортчиларимиз барча машғулотларни уй шароитида ўтказишди. Юртимизда жорий этилган карантин талаблари юмшатилиб, терма жамоамларимизга одатий ўқув-машғулот йиғинларини (ЎМЙ) ўтказишга рухсат берилди.

5 сентябрь куни каратэчиларимиз “Ширинбулоқ” спорт-соғломлаштириш базасида карантин ва санитария-гигиена талабларига қатъий риоя этган ҳолда навбатдаги ўқув-машғулот йиғинини бошлади.

Ушбу ЎМЙ бошланишидан аввал терма жамоамизнинг ҳар бири вакили Миллий олимпия қўмитаси қошидаги Республика спорт тиббиёти илмий-амалий маркази мутахассислари томонидан чуқурлаштирилган тиббий кўрикдан ўтказилди. Текширув жараёнида спортчилардан COVID-19 учун, шунингдек, мобил лаборатория таҳлиллари ҳам олинди.

Таъкидлаш жоиз, мазкур ўқув-машғулот йиғинида 12 нафар каратэчиларимиз иштирок этади ва улар ушбу машғулотларни бош мураббий Дилноза Бакирова ва катта мураббий Ўктам Бекпулатов бошчилигида олиб боришади. Спортчиларнинг саломатлигини назорат қилиш масъулияти федерация шифокори Бахриддин Ахмедов ва массажчи Ҳусан Турғуновларда бўлади. Машғулотлар 29 сентябрь кунига қадар давом этади.

“Ушбу ўқув-машғулот йиғини бизга сув ва ҳаводек зарур, чунки спортчиларимиз 5 ойдан кўп вақт мобайнида ўз уйларида ноқулай шароитда машғулот ўтказишди. Биз йиғин ўтказадиган ушбу кунни узоқ вақт кутдик. Мана, ниҳоят яна биргалашиб, машғулотларни ўтказамиз. Биз биринчи машғулотда жуда кўп ҳам юклама бермаймиз, асосий эътиборни тикланишга каратамиз”, – деди Дилноза Бакирова.

Leave a Reply

Your email address will not be published. Required fields are marked *