Паралимпиада-2020 олови Лондонда ёқилади

Токио-2020 Олимпия ва Паралимпия ўйинлари ташкилий қўмитаси Паралимпия машъаласи эстафетаси бўйича сўнгги тафсилотларни омма билан баҳам кўрди.

“Ўз нурингни баҳам кўр” шиори остида ўтказиладиган эстафета Паралимпия ўйинларига бўлган қизиқишни ошириш ва байрамона муҳитни яратиш мақсадида ташкил этилади.

Олов ёқиш минтақавий маросимлари Япониянинг 47 та перефектурасида 2020 йил 13 августдан 21 августгача жами 700 дан ортиқ жойларда бўлиб ўтади.

2020 йил 20 август куни Паралимпия ҳаракатининг руҳий ватани бўлган Буюк Британиядаги “Сток Мандевиль” стадионида Паралимпия оловини ёқиш маросими бўлиб ўтади. Ушбу тадбирда паралимпиячилар ва жамоатчиликнинг минглаб аъзолари Пара спорт турлари намойишлари, олов билан намойиш этиладиган ажойиб томошалар ва бошқа тадбирларга гувоҳ бўладилар.

Минтақавий олов ёқиш фестиваллари ва бошқа маросимларидан ташқари, Паралимпия тадбирлари ўтказиладиган тўрт префектурада машъала эстафеталари ўтказилади. Япония ва “Сток Мандевилда” аланга олган оловлар 21 август куни Токиода бирлаштирилиб, расмий Паралимпия олови ёқилади. Паралимпия машъаласи эстафетаси финал босқичи тўрт кун давом этади.

Ҳозирда олов ёқиш маросимлари ва эстафеталар учун номзодлар танлаб олиш жараёни бўлиб ўтмоқда.

Leave a Reply

Your email address will not be published. Required fields are marked *