Паралимпия ўйинлари: Пара-велоспорт

Пара-велоспорт – бу ҳа хил ногиронлик турига эга инсонлар учун мослаштирилган велосипед спорти. У Халқаро велосипедчилар иттифоқи томонидан бошқарилади.

Пара-велоспорт Паралимпия ўйинларининг энг шиддатли ва томошабоп спорт турларидан бири ҳисобланади. Унда 7 та йўналиш бор. Улар ўз ичига шоссе ва трек пойгаларини қамраб олади. Мусобақалар ёпиқ иншоотларда ва катта магистрал йўлларда ўтказилади.

Спортчилар мусобақаларда 3 хил велосипедда ҳаракат қилишади:

  1. Велосипедларда
  2. Хендбайкларда (қўлда ишлайдиган велосипед)
  3. Трициклларда (бу мия фалажи касаллиги мавжуд бўлган спортчилар учун мўлжалланган 3 ғилдиракли велосипед)

Айтиш керакки, пара-велоспорт Паралимпия тарихидаги энг ёш мусобақалардан биридир. Ушбу спорт тури бўйича дастлабки расмий мусобақалар ўтган асрнинг 80-йилларида бўлиб ўтган. Унда дастлаб кўриш қобилияти паст бўлган спортчилар иштирок этишган. Пара-велоспорт илк бор 1984 йил АҚШ ва Буюк Британияда ўтказилган ёзги Паралимпия ўйинлари дастурига киритилди. Унда ампутант спортчилар иштирок этишди.

Пара-велоспортда якка ва жамоавий баҳслар ўтказилади. Жамоавий беллашувларда бир мамлакатдан 3 та спортчи қатнашади. Кўзи ожиз спортчилар учун махсус велосипедлар кўрадиган жамоадоши билан тандемда ишлатилади. Улар шунингдек трасса пойгаларида ҳам иштирок этишлари мумкин. Аммо, ампутантлар ва мия фалажи бўлган велоспортчилар мусобақаларда фақатгина якка тартибда иштирок этишади. Бунинг учун улар махсус жиҳозланган велосипедлардан фойдаланишади.

Келаси йил Токиода бўладиган ёзги Паралимпия ўйинларида сайёрамизнинг энг кучли 230 та велоспортчиси 51 та медаллар тўплами учун кураш олиб боради.

Leave a Reply

Your email address will not be published. Required fields are marked *