3 нафар парасузувчимиз Токио-2020 йўлланмасига эга бўлди

Аввал хабар берганимиздек 9-15 сентябрь кунлари Лондон шаҳрида парасузиш бўйича навбатдаги жаҳон чемпионати ўтказилди.

Кеча мусобақанинг сўнгги кун баҳслари бўлиб ўтди. Жумладан, 50 метрга эркин усулда сузиш бўйича ўтказилган беллашувларда вакилларимиз муваффақиятли иштирок этишди. Аниқроғи, ушбу масофага сузишда Ислом Асланов иккинчи, Музаффар Турсунхўжаев эса учинчи натижани қайд этди ва улар мос равишда кумуш ҳамда бронза медалларига сазовор бўлишди.

Таъкидлаш керакки, ушбу мусобақада 7 нафар спортчи билан иштирок этган терма жамоамиз 1 та олтин, 4 та кумуш ва 3 та бронза, жами 8та медалга эга чиқди. Шу тариқа парасузувчиларимиз 60 та давлатдан 600 га яқин спортчи иштирок этган ушбу жаҳон чемпионатида умумжамоа ҳисобида 20-ўринни қўлга киритишди.

Яна бир қувонарли жиҳати, Халқаро Паралимпия қўмитасининг қарорига кўра ушбу жаҳон чемпионатида 1- ва 2- ўринни эгаллаган спортчилар келаси йил Токиода бўлиб ўтадиган Паралимпия ўйинларига тўғридан-тўғри йўлланмага эга бўлишди. Аниқроқ айтганда, Шохсанам Тошпўлатова, Ислом Асланов ҳамда Фирдавс Мусабековлар Токио-2020 Паралимпия ўйинларида иштирок этиш ҳуқуқини қўлга киритишди. Қолган спортчиларимиз эса бу йўлда муҳим рейтинг очколарига эга бўлишди.

Бизнинг қаҳрамонларимиз Лондон-Истанбул-Тошкент йўналиши билан 17 сентябрь куни эрта тонгда юртимизга қайтиб келишади.

Қуйида парасузиш бўйича бўлиб ўтган жаҳон чемпионати совриндорлари билан танишиб олишингиз мумкин:

Шохсанам Тошпўлатова – 1 та олтин, 1 та бронза;

Ислом Асланов – 3 та кумуш;

Фирдавс Мусабеков – 1 та кумуш

Нигора Мирзохидова – 1 та бронза

Музаффар Турсунхўжаев – 1 та бронза

Leave a Reply

Your email address will not be published. Required fields are marked *