Шу йилнинг 23-24 сентябрь кунлари пойтахтимиздаги муҳташам спорт мажмуаларидан бири «Ҳумо Арена»да парадзюдо бўйича IBSA Гран-приси бўлиб ўтади.

Қайд этиш лозимки, ушбу мусобақа Токио-2020 ёзги паралимпиада ўйинлари учун муҳим рейтинг очколарини тақдим этади. Шу сабабли жорий йилги турнир баҳсларини ҳар қачонгиданда кўтаринки руҳда ташкил этиш мақсадида беллашувларни кўп тармоқли «Ҳумо Арена» муз саройида ўтказиш режалаштирилган.

22 сентябрь куни Рамада меҳмонхонасида спортчиларнинг расмий вазн ўлчаш маросими бўлиб ўтади. Мусобақанинг очилиш маросими эса 23 сентябрь куни соат 15.30 да бўлиб ўтади. Турнирда эркаклар 7 та вазн тоифасида, аёллар эса 6 та вазн тоифасида медаллар учун кураш олиб борадилар.

Ғолиблар рейтинг очколари ва медаллар билан бир қаторда диплом ва пул мукофатлари билан тақдирланадилар.

1-ўрин соҳиби: 1,000 АҚШ доллари

2-ўрин соҳиби: 500 АҚШ доллари

3-ўрин соҳиби: 300 АҚШ доллари

 

Мусобақа тақвими

22 сентябрь 2019. 

Расмий вазн ўлчаш маросими (Рамада меҳмонхонаси)

 

23 сентябрь 2019

Эркаклар: -60 кг,-66 кг, 73 кг

Аёллар:  -48 кг,- 52 кг, 57 кг

 

24 сентябрь 2019

Эркаклар: -81 кг, -90 кг, -100 кг, +100 кг

Аёллар:  -63 кг, -70 кг, +70кг

 

Барча спорт иҳлосманларини «Ҳумо Арена» муз саройига таклиф этамиз.

 



Аввал хабар берганимиздек, бугун Қозоғистоннинг Атирау шаҳрида парадзюдо бўйича Осиё ва Океания чемпионатига старт берилди.

Австралия, Хитой, Индонезия, Ҳиндистон, Эрон, Япония, Ж.Корея каби 13 та давлатдан ташриф буюрган парадзюдочилар беллашаётган ушбу мусобақада Ўзбекистон парадзюдо терма жамоаси 11 кишилик таркиб билан иштирок этмоқда.

Дастлабки кунги баҳслар ўзбекистонлик парадзюдочилар учун омадли келди. Хусусан, паралимпиада чемпиони Шерзод Намозов -60 килограмм вазн тоифасида олтин медални қўлга киритган бўлса, -73 килограмм вазн тоифасида юртимиз шарафини ҳимоя қилган Феруз Саидов турнирнинг бронза медалига сазовор бўлди.

Аёллар ўртасида Севинч Салаева (-52 кг) ва Парвина Самандарова (-57 кг) ўз вазн тоифаларида барча рақибаларини мағлуб этиб, шоҳсупанинг энг юқори поғонасига кўтарилишди. -75 килограмм вазн тоифасида баҳс олиб борган яна бир ҳамюртимиз Лобар Хуррамова эса кумуш медаль билан тақдирланди.

Парадзюдо бўйича Осиё ва Океания чемпионати.
Атирау шаҳри, Қозоғистон

Эркаклар:
-60 кг: Шерзод Намозов – олтин медаль
-73 кг: Феруз Саидов – бронза медаль

Аёллар:
-52 кг: Севинч Салаева – олтин медаль
-57 кг: Парвина Самандарова – олтин медаль
-48 кг: Лобар Хуррамова – кумуш медаль



Ўзбекистон миллий паралимпия ассоциацияси 2007 йилда ташкил этилган. Ўтган давр мобайнида ташкилот Халқаро паралимпия қўмитаси, халқаро федерациялар ҳамда миллий паралимпия қўмиталари билан фаол ҳамкорликда имконияти чекланган инсонлар ўртасида спортни янада ривожлантиришда улкан ишларни амалга оширди.

Миллий паралимпия ассоциацияси Ўзбекистон худудида имконияти чекланган спортчилар ўртасида турли даражадаги мусобақаларни ташкиллаштиради ва ўтказади.  Паралимпиячиларга республика ва халқаро миқёсидаги мусобақаларга тайёргарлик кўришда тўлиқ ва сифатли шароит яратиш ташкилотнинг муҳим вазифаларидан бири ҳисобланади. Паралимпия ғоялари ҳамда қадриятларини мамлакат ва бутун дунё бўйлаб тарғиб қилиш, давлат ва жамият эътиборини имконияти чекланган инсонларга қаратиш ҳам Ўзбекистон миллий паралимпия ассоциациясининг асосий вазифасидир.

1

Ўзбекистонлик паралимпиячиларнинг илк катта мусобақаси 2010 йил Хитойнинг Гуанжоу шаҳрида ўтказилган Пара Осиё ўйинлари ҳисобланади. Ўшанда спортчиларимиз 1 та олтин, 2та кумуш ва 3та бронза, жами 6та медални қўлга киритишган ва умумжамоа ҳисобида 18-ўринни эгаллашган.

Сўнгра паралимпиячиларимиз 2014 йил Жанубий Кореянинг Инчеон шаҳри мезбонлик қилган навбатдаги Пара Осиё ўйинларида сезиларди ўсишга эришишди. Мусобақаларда 22та олтин, 5та кумуш ва 4та бронза, жами 31та медалга сазовор бўлган спортчиларимиз умумжамоа ҳисобида 5-ўринни қайд этишди. Таъкидлаш керакки, ушбу Пара Осиё ўйинларида жами 44та мамлакат спорчилари иштирок этишган эди.

2

Шуни алоҳида қайд этиш лозимки, 2016 йил Бразилиянинг Рио-де Жанейро шаҳрида ўтказилган навбатдаги Паралимпия ўйинлари мамлакатимиз паралимпия тарихида янги саҳифа очди десак асло муболаға бўлмайди. Боиси, мусобақага 32 нафар спортчи билан ташриф буюрган терма жамоамиз делегацияси 8та олтин, 6та кумуш ва 17та бронза, жами 31та медални қўлга киритди ва умумжамоа ҳисобида 16-ўринни эгаллади. Эътиборлиси, айнан Рио майдонларида ўзбекистонлик спортчилар илк бор Паралимпия ўйинларида олтин медалларга сазовор бўлишди.

Яна бир эътиборга молий воқеа 2018 йил Индонезияда ўтказилган Пара Осиё ўйинларида қайд этилди. Аниқроғи, терма жамоамиз бу сафар ўз тарихида энг кўп спортчилар делегацияси билан ташриф буюрди. Ушбу Пара Осиё ўйинларида жами 53 нафар спортчимиз иштирок этди ва рекорд даражада – 75 та медаль қўлга киритди. Шуларнинг 33таси олтин, 24таси кумуш ва 18таси бронза медалларидир. Якунда терма жамоамиз умумжамоа ҳисобида 6-ўриндан жой олди.

3

Ўзбекистон Паралимпия ассоциацияси 2014 йил Осиёнинг энг яхши спорт ташкилоти деб топилган.

Шерзод Намозов (Дзюдо), Ўткир Нигматов (Дзюдо), Одилжон Турдиалиев (Дзюдо), Хуснитдин Норбеков (Енгил атлетика), Александр Свечников (Енгил атлетика), Нозимахон Қаюмова (Енгил атлетика), Фирдавс Мусабеков (Сузиш) ва Фотима Амилова (Сузиш) каби спортчилар миллий паралимпиямизнинг довруғини жаҳонга ёйишда муносиб ҳисса қўшишмоқда.



Эртага Қозоғистоннинг Атирау шаҳрида парадзюдо бўйича Осиё ва Океания чемпионатига старт берилди.

12 та мамлакатдан 100 нафарга яқин парадзюдочилар беллашадиган ушбу мусобақада Ўзбекистон парадзюдо терма жамоаси 11 кишилик таркиб билан иштирок этади.

Ўзбекистонлик парадзюдочилари медаллар ҳамда Токио 2020 йўлланмасини берувчи муҳим рейтинг очколари учун ҳам кураш олиб борадилар.

Бироз аввал якунига етган қуръа натижаларига кўра парадзюдочиларимизнинг дастлабки рақиблари номи аниқ бўлди.

Эркаклар:

-60 кг: Шерзод Намозов – Х. Наингголан (Индонезия)

-73 кг: Феруз Саидов – С. Ким (Ж. Корея) / Д.Энхтуя (Монголия)

-81 кг: Давурхон Кароматов – Али Шанани (Эрон) / Д. Ким (Ж. Корея)

-90 кг: Шуҳрат Бобоев – Р. Самбув (Индонезия) / С. Парк (Ж. Корея)

-100 кг: Шариф Ҳалилов – Р. Кумар (Ҳиндистон)

+100 кг: Ширин Шарипов – Г. Чои (Ж. Корея) / К. Сато (Япония)

Аёллар:

-48 кг: Лобар Хуррамова – Л. Ли (Хитой)

-52 кг: Севинч Салаева – С. Лин (Хитой Тайпейи)

-57 кг: Парвина Самандарова – М. Гарини (Индонезия)

-63 кг: Нафиса Шерипбаева – П. Шарма (Ҳиндистон)

-70 кг: Васила Алибоева – П. Ванг (Хитой)

 



Жорий йилнинг 9-15 сентябрь кунлари Лондон шаҳрида пара сузиш бўйича жаҳон чемпионати бўлиб ўтади. Ушбу мусобақада дунёнинг 60 дан ортиқ мамлакатидан 600 га яқин спортчи иштирок этади. Таъкидлаш керакки, ушбу жаҳон чемпионати келгуси йил Токиода бўлиб ўтадиган Паралимпия ўйинларига лицензия бериши билан аҳамиятлидир.

Пара сузувчиларимиз ўтган ой жаҳон чемпионатига муносиб тайёргарлик кўриш мақсадида Белорусиянинг Брест шахрида ўқув-машғулот йиғинини ўтказиб қайтишгани ҳақида хабар берган эдик. Ушбу 1 ойлик ўқув-машғулот йиғини давомида терма жамоамиз аъзолари хорижлик рақиблари билан тажриба алмашиш имкониятига эга бўлдилар.

Лондондаги мусобақага эса қуйидаги пара сузувчиларимиз йўл олишди:

  1. Шохсанам Тошпўлатова
  2. Музаффар Турсунхўжаев
  3. Нигора Мирзохидова
  4. Фирдавс Мусабеков
  5. Кирил Панков
  6. Дмитри Хорлин
  7. Ислом Асланов.

Спортчиларимизга ўз олдиларига қўйилган вазифани муносиб бажаришларида омад тилаб қоламиз.



Венгриянинг Цегед шаҳрида ўтказилган параканоэ бўйича жаҳон чемпионатида Ўзбекистон паралимпия терма жамоаси муносиб иштирок этдилар.

Спортчиларимиз Ҳайитмурод Шерқўзиев ва Азизбек Абдулҳабибов ўз йўналишлари бўйича финалгача муносиб етиб келиб финал босқичида 4 ўринни қўлга киритдилар.

Шу билан бир қаторда Токио-2020 Паралимпия ўйинлари лицензияларини қўлга киритдилар.

Мирзаева Шахноза эса барча рақибларини енгиб Жаҳон чемпионатининг олтин медалига сазовар бўлди.

1. Шаҳноза Мирзаева (Ўзбекистон) – 47.29

2. Лаура Шугар (Буюк Британия) – 47.32

3. Шаҳло Беҳрузирод (Эрон) – 48.95

Мирзаева Шахноза Шокир кизи 1999 йил май куни Тошкент вилоятида туғилган. Параканоэ бўйича паралимпия терма жамоаси аъзоси. 2017 йил жахон чемпионати кумуш медали соҳиби, 2018 йил жахон кубоги олтин медали соҳиби, 2019 йил жахон кубоги олтин медали соҳиби ҳисобланади.

Халқаро Паралимпия Қўмитасининг қоидаларига асосан, финиш чизиғини кесиб ўтган дастлабки 6 қайиқ эгалари Токио Паралимпиадасининг йўлланмасига эга бўладилар.

Ўзбекистон делегацияси 28 август куни Тошкент вақти билан соат 07:00 да Истанбул-Тошкент йўналиши бўйича учиб келади.



Хабарингиз бор жорий йилнинг 19 август куни Ўзбекистон Миллий Паралимпия Ассоциациясининг навбатдан ташқари хисобот-сайлов конференцияси бўлиб ўтди, унда Мухторхон Махсудович Ташходжаев Ўзбекистон Миллий Паралимпия Ассоциациясининг янги рахбари этиб сайланди.

Бугун Тошкент шаҳрида жойлашган Паралимпия Марказида пара-дзюдо бўйича бўлиб ўтаётган ўқув- машғулот йиғинига Ассоциациянинг янги рахбари Мухторхон Ташходжаев ташриф буюрди ва терма жамоамиз аъзоларининг тайёргарлик жараёнини кузатди. Машғулот давомида пара-дзюдо бўйича Бош мураббий Сайидов Шамсиддин янги рахбарга спортчиларни таништириб ўтди ва 2-9 сентябр кунлари Қозоғистонда бўлиб ўтадиган Осиё ва Океания чемпионатига тайёргарлик кўришаётганини этиб ўтди.

Учрашув якунида Мухторхон Ташходжаев чемпионатда иштирок этадиган паралимпия спортчиларига омад ва зафарлар тилади.



Бугун МОҚда Ўзбекистон Миллий Паралимпия ассоциациясининг навбатдан ташқари ҳисобот-сайлов конференцияси бўлиб ўтди. Унда Жисмоний тарбия ва спорт вазирининг биринчи ўринбосари Ойбек Касимов, МОҚ вице-президентлари Азиз Камилов ҳамда Сакен Полатов, шунингдек, спорт жамоатчилиги иштирок этди. Конференцияда кун тартибига қўйилган асосий масала ассоциациянинг амалдаги раиси Улуғбек Мирҳайдаровнинг ўз хоҳишига кўра лавозимидан озод этилиши бўйича ёзган аризасини кўриб чиқиш ва унинг ўрнига янги раҳбар сайлаш бўлди. Йиғилиш давомида дастлаб У.Мирҳайдаров аризаси кўриб чиқилди. Конференция иштирокчилари бир овоздан унинг истеъфосини қабул қилишди. Шундан сўнг МОҚ вице-президенти Азиз Камилов сўзга чиқиб, ассоциация раҳбарлиги учун шу пайтгача Ўзбекистон Миллий Паралимпия ассоциацияси раиси ўринбосари лавозимида ишлаб келган Мухторхон Махсудович Ташходжаев номзодини илгари сурди ва йиғилганларга номзод ҳақида қисқача маълумот бериб ўтди. Овоз бериш жараёнида барча бир овоздан янги номзодни маъқуллади ва Мухторхон Ташходжаев Ўзбекистон Миллий Паралимпия ассоциациясига янги раҳбар этиб сайланди. “Аввало, менга билдирилган ишонч учун ҳаммага раҳмат. Олдимизда Токио-2020 Паралимпия ўйинларидек масъулиятли мусобақа турибди. Риода қайд этилган натижа тасодиф эмаслигини исботлаш учун барчамиз биргаликда ҳаракат қиламиз. Жамоанинг ҳамжиҳатлигисиз ҳеч нарсага эришиб бўлмайди. Умид қиламанки, барчамиз бир жамоа бўлиб, олдимизга қўйилган вазифаларни адо этамиз”, – деди Мухторхон Ташходжаев. Шунингдек, йиғилиш давомида Ойбек Касимов ва Азиз Камилов сўзга чиқиб, янги раҳбарнинг фаолиятида омад ва зафарлар тилаб ўтишди. Шунинг билан Ўзбекистон Миллий Паралимпия ассоциациясининг навбатдан ташқари ҳисобот-сайлов конференцияси ўз ишини якунлади. Тадбир якунига етгач, барча Миллий Паралимпия ассоциациясида жам бўлди. У ерда МОҚ президенти Рустам Шоабдураҳмонов Паралимпия ассоциацияси мутасаддилари, спортчи ва тренерлар билан суҳбатлашди. МОҚ президенти учрашув давомида ташкилот аъзоларига янги раҳбарни яна бир бор таништириб, М.Ташходжаевнинг фаолиятида омад тилади.



Ёш пара таеквондочиларимиз Осиё чемпионатидан ёруғ юз билан қайтиб келишди

Хабарингиз бор, Иордания пойтахти Амманда бўлиб ўтган Осиё чемпионатида пара таеквондочиларимиз 4та медални қўлга киритган эдилар.

Ўзбекистон Миллий Паралимпия Ассоциацияси спортчиларимизнинг келгусидаги фаолиятида ҳам улкан зафарлар тилаб қолади.



Жорий йилнинг 17-18 июл кунлари Иордания пойтахти Амманда пара таэквондо бўйича Осиё чемпионати бўлиб ўтди. Қизғин бахсларга бой ўтган чемпионатда 32та давлатдан 310та спортчилар юқори поғоналар учун куч синашдилар. Шулар орасида 4 нафар хамюртимиз муносиб иштирок эттилар ва 1та олтин, 1та кумуш, 2 та бронза медалларини Ўзбекистон хисобига қўшиб қўйдилар.

Ушбу Осиё чемпионатида паралимпия спортчиларимиз қуйидаги вазн тоифаларида шоҳсупага кўтарилдилар:

Азиз Марасулов / 75кг / Олтин медал

Санжар Мухторов / 61кг / Кумуш медал

Гулжаной Наимова / 58кг / Бронза медал

Зиёда Исакова / 49кг / Бронза медал